Поплави му се закануваат на светот
Објавено во: Свет 25 Септември, 2019
Нивото на морето расте сè побрзо, од Њујорк до Шангај се закануваат големи поплави.
Меѓувладиниот панел за климатски промени (IPCC) објавил извештај според кој нивото на морето ќе се крене многу повеќе од тоа што се очекувало до 2100-та година, јавува CNN.
Мразот од Хималаите до Антарктикот забрзано се топи и градовите како Њујорк или Шангај многу веројатно ги чекаат редовни поплави.
Ледената плоча на Гренланд, која може, ако се стопи, да го зголеми нивото на морето за шест метри, се топи најбрзо. Меѓу 2006-та и 2015-та година изгубила повеќе од 275 гигатони мраз годишно.
Ледениот покрив на Антарктикот исто така рапидно исчезнува. Загубата на неговата маса тројно се зголемила меѓу 2007-ма и 2016-та година во однос на претходните 10 години.
На извештајот со име "Special Report on The Ocean and Cryosphere in a Changing Climate" работеле повеќе од 100 научници од 36 земји. Станува збор за последниот од три специјални извештаи на IPCC по оној од октомври минатата година, кој покажал дека имаме време само до 2030-та година да го одржиме глобалното затоплување под 1,5 степени Целзиусови.