ПЕШЕВА ПО АВИОНОТ ВО ФИНСКА: Итно воведување ПЦР тестови за влез, ама и за излез од Македонија
Објавено во: Македонија 11 Август, 2020
Серија граѓански реакции за авионот кој патувал за Финска и во кој беа откриени 24 патници позитивни на коронавирусот.
Министерството за здравство објави дека по проверка на информациите со службите од Скопскиот аеродром и граничната полиција, станува збор за патници, иселеници, коишто доаѓаат во Македонија, или транзирираат преку Македонија од различни причини, а потоа се враќаат на работа во Западна Европа, за коишто со дозвола за престој или државјанство од ЕУ не важат рестрикциите при влез и излез од земјата.
Министерството за здравство собира информации од финските власти, за тоа кои се 24 патници позитивни на вирусот, дали станува збор за неколку семејства или се поединечни случаи, каков тип на тестови им биле направени, а Институтот за јавно здравје веќе работи на проверка дали на некои од патниците им била издадена мерка самоизолација во нашата земја. По добивање на информациите за позитивните веднаш ќе се пристапи кон утврдување на контактите кои тие лица со позитивни тестови евентуално ги имале во нашата земја.
Дел од граѓаните веќе реагираат дека земјава под итно мора да воведе ПЦР тестови за влез, но и за излез од државава.
„Авионот со заразени патници од Македонија од кои само двајца биле со македонски пасош, го отвора прашањето на итно воведување ПЦР тестови за влез, а богами и за излез во/од државава. Цела Европа зборува за авион од Македонија, никој не гледа од каде се патниците. Утре кога ќе донесат нова одлука за држење затворени граници за граѓаните од Македонија, ќе се однесува за нас, заглавените тука, за нашите конекции со светот, за нашите патувања, за нашите бизниси, не за тие што си транзитираат лабаво“, напиша на фејсбук Ели Пешева.
Веќе се извршени проверки за сите патници од авионот за Финска. Ниту еден од нив не е регистриран во базата на позитивни случаи со Ковид-19 во нашата земја, што значи немаат решение за изолација како позитивни од Државниот санитарен и здравствен инспекторат.