Пауновски: Во Битола запечатени повеќе од 40 кафемати
Објавено во: Економија 03 Април, 2020
Стојко Пауновски, директорот на Државниот пазарен инспекторат, денеска објави дека во Битола во последниот период се запечатени повеќе од 40 кафемати на јавните места со цел граѓаните да не се собираат каде што се точи кафе.
- 42 или 43 кафемати се запечатени со налепница од инспекторатот, за да нема собирање на луѓе, на бензински пумпи и во трговски објекти, рече Пауновски на денешната прес-конференција.
Додаде дека 16 угостителски објекти во Битола се затворени, а производител на брашно формирал поскапа цена од пред 11 март, по што му е издаден платен налог и ќе се изврши дополнителна контрола да се провери дали е вратена цената.
Претседателката на Инспекцискиот совет, Магдалена Филиповска-Грашкоска, рече дека во последните пет дена на ниво на Македонија има помал број на случаи на зголемување на цената на цитрусно овошје и дека и понатаму се вршат укажувања да се вратат замрзнатите цени од пред 12 март.- Меѓутоа, голем број од пријавите од граѓаните за цени на лимоните се неосновани. Постапено е и по една пријава за фалсификати на средства за дезинфицирање, информираше Филиповска-Грашкоска
Ањадин Хавзио информираше дека до Државниот инспекторат за труд најголем број на претставки од работници пристигнуваат за неплатено отсуство на родител на дете до 10 години.