Паднаа 10 сантиметри снег, се блокираше сообраќајот во струшко
Објавено во: Македонија 04 Декември, 2012
Со 10 см снег на коловозот е речиси блокиран сообраќајот на патот што ги поврзува струшките села Лабуништа и Јабланица и денеска се одвива во многу отежнати услови.
Од секцијата на јавното претпријатие „Македонија пат“ во Струга, која е задолжена за третирање на овој патен правец велат дека патот не е расчистен затоа што немаат соодветна механизација.„ Патот е од четврти приоритет. За вакви патишта ни се неопходни возила со двојна влеча за да можат да искачуваат угорнини кои во моментов не се исправни и се наоѓаат на поправка. Истото е и со патниот правец кон селото Мислодежда“, појаснува раководителот на струшката секција Светозар Колоски.
Од „Македонија пат“ во струшкиот реон потврдија дека во текот на ноќта интервенирале во три наврати на патниот правец што води кон граничниот премин „Ќафасан“, како и на патот Струга-Дебар.