ОВДЕ БАЛАНСОТ МЕЃУ РАБОТА И ЖИВОТ Е НАЈДОБАР: Колку подолго работно време толку помалку време за себе
Објавено во: Стил 11 Октомври, 2019
Ако сте фрустрирани со рамнотежата на животот и работата, можеби ќе сакате да размислите да се преселите во Холандија.
Имено, според најновите истражувања на Организацијата за економска соработка и развој (ОЕЦД), Холанѓаните не работат премногу напорно и имаат доволно слободно време и за одмор и за спиење.
Индексот на ОЕЦД ги рангира земјите според тоа колку добро граѓаните можат да го балансираат приватниот живот и работата.
Холандија е индексирана со дури 9,5 од максимум 10 поени, по што следат Италија со индекс од 9,4 и Данска со 9.
На другата страна на списокот со 40 земји, на дното, се Колумбија и Мексико.
Само 0,4 проценти од вработените во Холандија работат „многу долги“ часови - работно време подолго од 50 часа неделно. Колку е тоа малку покажува фактот што просечниот процент на луѓе кои работат премногу долго е 11 отсто.
Премногу работа е опасност за здравјето
„Долгото работно време може да биде штетно за здравјето. Колку повеќе луѓето работат, толку помалку време имаат за други потребни активности, како што е личното внимание или слободното време“, се вели во студијата.
Истражувањето исто така го мери количеството на време што еден вработен со полно работно време го поминува на одмори и како лична грижа или слободно време.
Италија е на врвот на овој индикатор со 16,5 часа, а потоа следат Франција, Шпанија и Данска.
Во индексот на ОЕЦД, сите 10 први места ги зазедоа европските земји. САДсе рангираат на 27-то место, со 11 проценти од луѓето таму работат премногу долго.
Истражувањето покажало дека од лошата динамика на приватниот и деловен живот најмногу погодени се семејствата така што ОЕЦД ги советува владите да помогнат во решавање на ова преку промовирање флексибилни работни практики.