Oва се земјите кои бараат датум за преговори за Македонија
Објавено во: Македонија 11 Јуни, 2019
Министрите за надворешни работи на Чешка, Естонија, Летонија, Литванија, Унгарија и Бугарија, како и на Италија, Малта, Австрија, Хрватска, Словенија, Полска и Словачка денеска во заедничко соопштение ги повикаа членовите на Европскиот совет да донесат одлука за отпочнување на преговорите со Северна Македонија и Албанија месецов.
Сметаат дека од суштинско значење е да се обезбеди севкупен напредок во регионот.
Наведуваат дека ЕУ треба да ја исполни својата недвосмислена определба за европската интеграција на Западен Балкан.
Според нив, не постои „план Б“ за регионот.
„Со оглед на важноста на нејзината одлука за иднината на сите држави и народи во Европа, ги повикуваме членовите на Советот да преземат далекусежни, храбри одлуки во јуни, со што ќе се промовира континуиран напредок во реформите во согласност со стандардите и вредностите на ЕУ, како и зајакната регионална соработка, помирување, добрососедски односи и клучна поддршка за неповратниот мир, стабилност и развој на регионот и нашиот континент. Пред Советот за општи прашања во јуни, апелираме до сите носители на одлуки во ЕУ да го задржат и консолидираат позитивниот импулс со отворање на пристапните преговори со Република Албанија и Република Северна Македонија“, стои во заедничкото соопштение.
Веруваат дека ако почнат со преговори, двете држави ќе се фокусираат на реформите.