Оливер Вархељи, наследникот на Јоханес Хан, денеска за прв пат во Македонија
Објавено во: Македонија 15 Јануари, 2020
Оливер Вархељи, новиот Еврокомесар за проширување и наследник на Јоханес Хан, денеска за прв пат откако е избран е во работна посета на нашата земја. Унгарецот во Владата на Република Северна Македонија ќе биде пречекан од премиерот Оливер Спасовски на платото пред владината зграда, а по кратката средба ќе одржат заедничка прес-конференција.
Тој ќе се сретне и со претседателот Стево Пендаровски и со претседателот на Собранието, Талат Џафери. Тој исто така ќе има состанок и со претседателот на СДСМ, Зоран Заев како и со претседателот на ВМРО-ДПМНЕ, Христијан Мицковски. Посетата на Комесарот Вархељи во регионот ќе продолжи во Албанија следниот ден.
Централна тема треба да биде очекуваниот датум за преговори со ЕУ и предложената методологија на Франција за која се дебатира во моментов во Брисел. Еврокомесарот ќе се информира и за текот на реформите во земјава, особено донесувањето на законот за јавно обвинителство. Европската комисија ќе објави мини-извештај за Македонија и Албанија во февруари, а новата методологија, според најавите, се очекува да биде усвоена во март.
На 18 декември минатата година вицепремиерот за европски прашања Бујар Османи се сретна со Вархеји во Брисел, при што му го претстави реформскиот план на Владата до самитот на Европскиот совет во март.
Ставот на Вархељи е дека пристапните преговори со Македонија и Албанија треба да почнат на пролет и дека ЕУ треба да ја исправи грешката од октомври. Европската комисија треба да излезе со предлог за новата методологија до крајот на јануари.