ОД ВЛАДАТА УШТЕ НЕМА РЕАКЦИЈА - опозицијата упорно бара одговор чие е комбето со фатената дрога

Добивај вести на Viber

Од Владата вчера немаше реакција по прозивките од портпаролот на опозициската ВМРО-ДПМНЕ, кој бараше одговори дали комбето во кое е фатена дрогата завчера е на фирма поврзана со Трајче Заев и Бобан Заев.

Тој вчера вечерта преку фејсбук го повтори барањето да се каже чие е комбето.

“Кратко и јасно ДА или НЕ? Не боли одговорот, ама значи десетина години затвор“, напиша Арсовски на Фејсбук.

Претходно тој рече дека според неофицијалните информации „во акцијата преводена од американската агенција за борба против дрогата, ДЕА, запленета е дрога во вредност од 800.000 евра, во бело комбе со грчки таблици, во сопственост на фирма која е партнер во битолската фирма за канабис „Медикал 420“. Пратечките возила на дрогата биле управувани од возачот на Трајче Заев (прв и најблизок братучед на Премиерот Заев) и Кире „Чипсио“ Спиркоски кој е близок до СДСМ и Оливер Спасовски и е командир на Полициската станица – Прилеп“.

Премиерот Зоран Заев вчера немаше напишано ништо на оваа тема на својот фејсбук профил.

Последната објава е препораката до граѓаните да носат маски и да седат дома како заштита од пандемијата со ковид 19.

Од Владата, пак, за 360 Степени изјавиле дека „Владата очекува брза и темелна истрага од надлежните инситуции, одговор на прашањата кои се од интерес на јавноста и неселективно постапување без разлика за кого станува збор. Доколку некој постапил незаконски мора да се соочи со одговорност. Во врска со сопственост на возила на приватни субјекти ве упатуваме за тоа да прашате во компаниите кои се предмет на интерес“, одговориле од Владата за тој портал.

Од МВР вчера потврдија дека се уапсени шест слица за овој случај, меѓу кои и А.У. од Скопје. Овие иницијали се совпаѓаат со оние на кои повикува ВМРО-ДПМНЕ.