ОД ФАРСКИТЕ ОСТРОВИ ЗА ФАКТОР: Немаме ниту еден починат од коронавирус, туризмот се врати во нормала

Добивај вести на Viber

Фарските острови се една од земјите во светот каде засега нема ниту еден починат од коронавирусот.

Досега се регистрирани 188 случаи на заразени, и сите се oздравени. Активни случаи нема. Во земјата се направени 17,468 тестови за Ковид -19.

Сузана Соренсен, која работи на туристичка промоција на земјата вели дека имале добар одговор на пандемијата, а туризмот се врати во нормала.

„За среќа имавме добар одговор на избувнувањето на Kовид-19. Од првиот позитивен пациент, фокусот беше ставен да се утврдат сите со кои заразеното лице било во контакт и да ги испратат тие лица во карантин 14 дена. Владата и здравствените власти се држат до оваа стратегија од првиот ден. Немаме активни случаи од средината на април и откако Фарските острови повторно се отворија за патување, сите треба да бидат тестирани и да бидат во карантин додека резултатот не биде подготвен, обично во рок од 12 часа. Не сме носеле маска, но ги следевме препораките за хигиена, и да, многумина се плашеа и побараа Фарските острови да останат затворени, така што не добиваме нови случаи. Сепак, политичарите сакаа повторно да ја отворат земјата, исто така затоа што голем број луѓе патуваат во странство за работа, а некои и на медицински лекувања, па затоа се отворија, но тестот е услов“, вели Соренсен.

Додава дека од 15 јуни се отворени за странци, веќе имаат туристи и тоа е добро.

„Највеќе туристи имаме од Данска и од другите нордиски земји“, рече Соренсен.

Малите Фарски Острови со помалку од 50.000 жители, се наоѓаат некаде на пола пат помеѓу Норвешка и Исланд. Тие се мошне интересен архипелаг од островчиња кој ги меѓепсува посетителите со своето беспрекорно зеленило.

Во текот на годината Фарските Острови ги посетуваат околу 100.000 туристи.

Земји каде нема починати од коронавирусот се и Лесото, Бутан, Уганда, Француска Полинезија, Источен Тимор, Фиџи, Лаос, Доминиканската република и други.