НОВИ ПУНКТОВИ ЗА ТЕСТИРАЊЕ: И во поликлиниката Ѓорче Петров ќе се прават ковид-тестови

Добивај вести на Viber

Во поликлиниката „Ѓорче Петров“ ќе почне да функционира уште еден пункт за тестирање од корона вирусот, потврди за Фактор, директорот на Здравствен дом Скопје, д-р. Виктор Исјановски. Вели дека во тој реон на Скопје гравитираат дури околу 170.000 луѓе, а најблискиот пункт до сега функционира во центарот на главниот град, односно во поликлиниката Идадија.

-Се е подготвено во поликлиниката „Ѓорче Петров“. Сметаме дека треба да отпочне со работа и овој пункт каде ќе се прават ковид-тестови, бидејќи во овој дел на главниот град има огромен број популација. Ќе им биде многу поблиску на граѓаните од Сарај, Влае, Ѓорче Петров и другите населби...Целосно е опремен со комјутери, потребна апаратура, помина и инспекција за да се направи увид дали се запазени сите протоколи, вели д-р. Исјановски.

Тој нагласува дека доколку има потреба ќе се отвори и пункт во поликлиниката Драчево. Инаку, за сега функционираат лабораториите за тестирање во здравствените установи „Јане Сандански, Идадија, во Чаир и во Ченто.

Тимовите кои земаат брисеви од суспектни граѓани на Ковид-19 се од Центарот за јавно здравје на Град Скопје, но тие сега се засилени дополнителен кадар, односно со лаборанти од Здравствен дом Скопје.

-Во време на корона кризата секаде има потреба од дополнителен кадар, екипите се заморени по четиримесечна постојана работа на терен. Секаде се прават ротации за да можат малку да се одморат. Тимовите од Центарот за јавно здравје кои ги вршат тестирањата сега се засилени со лаборанти од Здравствен дом Скопје, вели д-р. Исјановски.