Нина Ангеловска: Се исплаќаат поголемите плати
Објавено во: Економија 07 Октомври, 2019
Нина Ангеловска, министерката за финансии, бранејќи го за прв пат пред пратениците ребалансот на Буџетот за 2019 година на Пленарна седница во Собранието рече дека повисоките плати од 5 одсто за државните службеници веќе се исплаќаат.
Ангеловска потсети дека веќе започна исплатата на повисоката септемвриска плата во јавната администрација, во здравството, во образованието, во градинките, во полицијата, културата, одбраната и во другите дејности во јавната администрација.
-Од овој Ребаланс за граѓаните обезбедуваме поддршка за поголеми плати за вработените во приватниот сектор, поголеми плати за вработените во јавната администрација, повеќе средства за поддршка на активните мерки за вработување за невработените граѓани и конечно, за нешто помалку од три месеци првпат на граѓаните ќе им бидат вратени првите пари преку проектот мојДДВ. А ова не е единствената придобивка од овој проект, зашто преку мојДДВ граѓаните директно ја помагаат борбата за намалување на сивата економија, рече Ангеловска.
Ангеловска додаде дека досега годинава се исплатени седум милијарди денари за социјална заштита, за исплата на пензиите се наменија 42,1 милијарди денари а за исплата на паричен надоместок во случај на невработеност 654 милиони денари за активни мерки за вработување.