Никола Наумовски: Статистички загаденоста е намалена во Скопје
Објавено во: Македонија 22 Јануари, 2020
Никола Наумовски, шефот на кабинетот на скопскиот градоначалник Петре Шилегов, во синоќешната дебата со еко-активистите на МРТ рече дека статистички оваа година загаденоста во главниот град е намалена во однос на претходно, особено кога станува збор за концентрацијата на ПМ10 честички.
- Според статистиката која се води, Скопје има многу помалку загадени денови сега, водејќи сметка за сите параметри, како што е ветерот. Она што може да го направи Скопје, без да ги сметаме државните мерки, е тоа што со својата градска инспекција дава придонес во намалувањето на загаденоста. Изгаснати се 113 стрништа и отпади кои гореле, а тоа е двојно повеќе од една година претходно. Излегувањето на инспекцијата на терен заедно со социјален работник и полицаец дава резултати, рече Наумовски.
Тој вели дека тоа се краткорочни мерки со кои кои Град Скопје може да се бори, додека долгорочните се системски и во тој правец се работи на топловодната мрежа и гасификацијата. Во меѓувреме, вели дека мора да продолжи субвенционирањето на купувањето на климатизерите кај домажинствата и замената на котлите во училиштата.