Нема угостителски услуги во обложувалници по 23 часот

Добивај вести на Viber

Ниту спортските обложувалници нема да нудат угостителски услуги по 23 часот. Од Асоцијацијата на спортски обложувалници велат дека тоа произлегува со новите мерки за заштита од Ковид-19. 

„Во целост ја разбираме епидемиолошката состојба во земјата и даваме поддршка на институциите во борбата за справување со вирусот. Откако со одлука на Владата, спортските обложувалници од 13 мај повторно ги отворија своите уплатно-исплатни места, работиме во целост согласно протоколите пропишани од Комисијата за заразни болести и ниту еден наш објект не е затворен заради Ковид-19. Продолжуваме доследно да се придржуваме до протоколите, грижата за нашите вработени и играчи и заштитата на колективното здравје остануваат наш највисок приоритет, стои во соопштението. 

Од АСОМ апелираат граѓаните да ги почитуваат мерките за лична заштита. Велат дека според проколот за работа,  во сите членки на АСОМ на влез се поставени дезинфекциски средства, вработените носат заштитна маска, на шалтер е присутен по еден играч со растојание од 2 метра со играчот кој следен чека за уплата, а во објектите во текот на работното време и по завршување се врши редовно чистење и дезинфекција на сите простории и инвентар.

Потсетуваат дека спортските обложувалници беа меѓу првите деловни субјекти кои со рестриктивните мерки на Владата за заштита од ширење на Ковид-19 беа целосно затворени од 14 март 2020 година. Велат дека и покрај големите загуби во текот на двомесечното затворање, немаа отпуштања и ги задржаа сите свои вработени.