НЕМА СПАС ОД КАМАТИТЕ И ДОЛГОВИТЕ - СДСМ обвинува дека ВМРО-ДПМНЕ намерно го блокира законот

Добивај вести на Viber

Владејачката СДСМ ја обвинува ВМРО-ДПМНЕ дека намерно го блокира носењето на законот со кој треба да се отпишат каматите и да се репрограмираат долговите на граѓаните. 

Пратеникот од СДСМ Костадин Ацевски денеска на прес конференција рече дека опозицијата и натаму со своите штетни политики им нанесува директна штета на граѓаните и на нивната благосостојба.

„Веќе една недела ВМРО-ДПМНЕ го блокира Законот за отпис на камати и репрограмирање на долгови на физички лица. Пратениците од оваа партија очигледно се против отписот на каматите и долговите што граѓаните ги имаат. Христијан Мицкоски и неговите пратеници блокираат закон кој ќе значи конечно решавање на проблемот со старите судски и извршни предмети, трансферирани кај извршителите и нотарите во 2011 година, како и предметите дадени за извршување за наплата на долгови пред извршителите заклучно со декември 2017 година“, рече Ацевски.

Според него, наместо граѓаните да се одлободат од нивните долгови, поради штетните политики на ВМРО-ДПМНЕ, тие и понатаму ќе стравуваат како да се справат со каматите и долговите.

„Доколку ВМРО-ДПМНЕ продолжи со политиката на блокада и кочење на се што е добро за граѓаните, постои опасност ова законско решение да не биде усвоено, бидејќи има уште десетина дена до распуштањето на Собранието“, предупреди Ацевски. 

Тој додаде дека ВМРО-ДПМНЕ прави се, како што рече, за да ги блокира и законот за отпис на камати и репрограмирање на долгови за јавни претпријатија, законот за легализација на бесправно изградени објекти, законот за Академија за судии и јавни обвинители, законот за поништување на лустрацијата…

Инаку, власта сакаше овој закон да биде изгласан најдоцна до 12 февруари, кофа се распишта парламентот, бидејќи тоа нема да може потоа да се стори се до завршувањето на изборите.