НЕМА ДА ОСТАВИМЕ НЕЗГРИЖЕН НИТУ ЕДЕН ВОЈНИК СО НАПОЛНЕТИ 45 ГОДИНИ - Од Одбрана ги отфрлаат обвинувањата
Објавено во: Македонија 07 Март, 2021
Министерството за одбрана ги отфрла наводите на групата професионални војници - дека не води грижа за решавање на нивниот статус.
„Ниту еден професионален војник со наполнети 45 години нема да остане незгрижен или со нерешен статус во однос на втората кариера. Тоа сме го правеле досега, тоа ќе го правиме и отсега“, рече денес во изјавата државниот секретар во Министерството за одбрана, Драган Николиќ.
„Министерството за одбрана останува посветено на својот приоритет околу решавањето на прашањето на професионалните војници со наполнети 45 години. Оваа грижа и овој приоритет ќе биде решаван и понатаму како и до сега”, истакна тој.
Николиќ посочи дека со најновите измени на Законот за служба во Армијата се создаваат дополнителни можности за оваа возрасна група војници, кои ќе можат да избираат помеѓу натамошна служба или добивање на отпремнина.
„На 1 февруари го објавивме проектот околу решавањето на статусот на војниците од 45 години возраст. Нашите чекори беа поздравени од синдикатите во одбраната. Дополнително отвораме и нови можности преку пополнување на противпожарната територијална единица низ целата држава”, рече државниот секретар и апелираше до Собранието на Република Северна Македонија час поскоро да бидат донесени измените во Законот за служба во Армијата со цел да се пристапи кон нивна примена.