НЕ Е ПОЛИЦАЕЦ ЧОВЕКОТ ШТО ПОМИНА ПАТАРИНА САМО СО ЛЕГИТИМАЦИЈА - МВР го расчисти случајот
Објавено во: Македонија 20 Јануари, 2021
Секторот за внатрешни работи Тетово го расчисти случајот со видео-клипот објавен на 15 јануари годинава на социјалната мрежа „Тик-ток“, на кој се гледа како машко лице покажува некаква легитимација на наплатна станица и без да плати надоместок, поминува со возило „мерцедес“ со гостиварски регистарски ознаки.
Ова го објави Министерството за внатрешни работи.
„Станува збор за М.З. (32) од тетовско Желино и со него вчера (18.01.2021) е извршен службен разговор во полициска станица, а по целосно документирање на случајот ќе следи и соодветен поднесок“, се вели во соопштението.
Инаку, МВР потенцира дека М.З. не е вработен во Министерството за внатрешни работи на Република Северна Македонија, како што беше објавено во дел од медиумите.