НАСИЛСТВОТО НЕ ЗАПИРА: Експлозиите продолжија утрово во Ерусалим

Добивај вести на Viber

Палестинците продолжија да гаѓаат со ракети кон Израел, а армијата одговори утрово со воздушни напади врз Газа во драматична ескалација на конфликтот во Ерусалим.

Експлозиите ги потресоа објектите низ цела Газа и звучеа сирени за опасност од ракета, а многу Израелци ја поминаа ноќта во засолништа. Палестинските власти соопштија дека во воздушните напади загинале двајца Палестинци, а над 100 се повредени. Израелската армија објави дека шест израелски цивили се ранети во ракетните напади на палестинските сили утринава.

Војската исто така потврди дека извршила десетици воздушни напади врз појасот Газа во текот на ноќта, насочени кон воени инсталации и припадници на Хамас.

Во Газа, синоќа во израелски напади беа убиени 22 лица, од кои девет деца, а над 700 Палестинци беа повредени во судирите со израелските сили во Ерусалим и преку Западниот брег во последните 24 часа, а 500 од нив беа примени во болници , пренесува АП.

Милитантите во Газа вчера започнаа ракетни напади врз областа Ерусалим, првпат по војната во 2014 година, што ја премина, како што рече израелскиот премиер Бенјамин Нетанјаху, „црвената линија“. Тој рече дека борбите можат да продолжат уште некое време и дека кој ќе го нападне Израел ќе плати висока цена.

Последниот бран судири меѓу Палестинците и израелската полиција започна во петокот вечерта на планината Храмот во Ерусалим, свето место и за муслиманите и за Евреите.

Тензиите се зголемија и околу потенцијалното иселување на Палестинците од земја за која тврдат еврејските доселеници, а судот, кој требаше да донесе одлука по жалбите на палестинските семејства во понеделник, го одложи рочиштето закажано за нов датум во следните 30 дена.