НАМЕСТО ПРОТИВ КОРОНА, ГИ ВАКЦИНИРАЛА ПРОТИВ ОБИЧЕН ГРИП - сестра од БиХ е отстранета од работа, се води истрага

Добивај вести на Viber

Медицинска сестра во Добој во северна БиХ погрешно вакцинирала осум лица наместо со вакцина против коронавирус, давајќи им вакцина против сезонски грип, но тие не се загрозени, рекоа властите.

Полициската управа на Добој објави дека вработената во локалниот здравствен дом требало да аплицира вакцина на Синофарм, која штити од коронавирус, но наместо тоа, на пациентите им дала вакцина против сезонски грип на крајот од минатата недела.

Откако била утврдена грешката, процесот на вакцинација бил прекинат, додека медицинската сестра била отстранета од работа, а полицијата започнала истрага. Лекарите ги известиле граѓаните кои примиле погрешна вакцина и објасниле дека нема опасност по нивниот живот и здравје или какви било можни последици.

Здравствените власти најавија внатрешна истрага за овој пропуст и потоа ќе одлучат за можните санкции.

Во споредба со земјите од регионот, Босна и Херцеговина доцни со процесот на вакцинација. Се проценува дека не се вакцинирани повеќе од 10 проценти од околу 3,5 милиони луѓе. Причината за ова е лошата координација на државните и ентитетните власти, кои се одговорни за здравствениот сектор, за набавка на вакцини, како и голем број скандали поврзани со кризата со корона, но и слабости поврзани со системот Ковакс, меѓународен механизам за набавка на вакцини против коронавирус.

Извор: Индекс.хр