Намален бројот на жалби по јавните набавки

Добивај вести на Viber

Бројот на жалби по јавните набавки минатата година е намален во споредба со изминатите години, покажува годишниот извештај за работата на Државната комисија за жалби по јавни набавки.

Претседателката на Комисијата Маја Малахова на денешната седница на собраниската Комисија за финансирање и буџет информира дека минатата година постапиле по 561 жалба што е намалување во однос на 2011 година кога имало 690 жалби или во споредба со 2010 година кога Комисијата постапила по 868 жалбени предмети.

- Според податоците добиени од Бирото за јавни набавки, минатата година биле објавени 11.689 огласи за јавни набавки. Од нив жалбени предмети биле 561 или само во 4,80 проценти биле обжалени предметите објавени како јавни набавки, рече Малахова.

За концесии се објавени 13 огласи и за нив имало четири жалби, а за јавно-приватно партнерство имало 10 објави за кои имало само една жалба. Вредноста на жалбените предмети изнесува околу 12 милијарди денари.

Бројот на одбиени жалби, како што оцени Малахова, се намалува во поглед на бројот на уважени жалби и најмногу се користи отворената постапка, а најмалку постапката со преговарање без објавување на оглас.

Комисијата побара дел од уплатените средства од кои се зема надоместок за водење на жалбената постапка и административна такса да се уплатуваат на сметка на државната комисија, а предлага да се направат и законски измени во делот на негативната референца.

Според претседателот на собраниската Комисија Маријанчо Николов, треба да се зголеми финансиската независност на Комисијата за жалби по јавни набавки затоа што сегашниот модел на финансирање од Буџетот на Република Македонија ја ограничува нејзината работа како независно регулатно тело. Предложи и следење на целосната реализација на постапката за јавни набавки бидејќи, како што посочи, честопати се случува најниската цена поради која е избрана некоја понуда за најповолна, да биде зголемена со анекс договори.