Нафтените трговци ќе се опарат, државата ќе им плаќа за чување на резервите
Објавено во: Економија 14 Јуни, 2019
Државата ќе им плаќа на нафтените трговци по 2,5 евра по тон на нафтените трговци кои ќе ја складираат нафтата што како резерва и припаѓа на Дирекцијата за нафтени резерви. Претходно увозниците во земјата не добиваа никаков надомест за оваа услуга а беа должни да ја чуваат во своите складишта.
- Со Уредбата за утврдување на висината на надоместот за чување и евапорација (испарување) на нафта и нафтени деривати од задолжителните резерви што ја усвои Владата на последната седница и се овозможува на Агенцијата за нафтени резреви практично да плаќа надомест за чувањето на нафтените резерви. Цената е 2,5 евра по тон. Агенцијата во својот Буџет има обезбедено средства за исплата, потврди министерот за финансии Драган Тевдовски.
Агенцијата за нафтени резреви ќе плаќа надомест откако Уредбата ќе биде објавена во Службен весник.
Инаку, граѓаните со секој купен литар гориво и плаќаат на државата од 0,3 до 0,89 денари за нафтените резерви, па по оваа основа државата годишно собира околу осум милиони евра, но фирмите што ги чуваат резервите, со години не добиваа никаков надоместок.
Актуелниот начин на добивање „компензација“ е застарен и потекнува од времето на СФРЈ со кој компаниите може да го користат горивото од резервите, но потоа да го вратат, што во суштина значи никаква добивка за тоа.
Проценките говорат дека приватните компании годишно трошат по 3 до 4 милиони евра за чување на државните резерви на нафта во своите резервоари.
Самата Дирекција тоа го признава дека овој начин на обврските повеќе не кореспондира со реалната ситуација и бара „итно решавање на ова горливо прашање“.