Нафтата со скок, нафташите со договор: Што се случува
Објавено во: Економија 08 Март, 2021
Цените на нафтата пораснаа за повеќе од 2 проценти, на 69 долари, што е највисока бројка од јануари минатата година.
Цената на нафтата скокна откако членовите на Организацијата на земјите извознички на нафта (ОПЕК) и нивните сојузници се согласија да не ја зголемуваат понудата во април и да чекаат значително закрепнување на побарувачката.
Фјучерсите на суровата нафта „брент“ пораснаа за 1,52 долари, или 2,3 отсто, на 68,26 долари за барел, а лесната нафта WTI порасна за 1,30 долари, или 2,0 отсто, на 65,13 долари, така што обете светски референци за нафта се на пат да забележат значителни неделни добивки.
Така, цените на „црното злато“ скокнаа за повеќе од 4% по состанокот на групата ОПЕК +, на кој беше донесена одлука за продолжување на ограничувањето на производството до април, со исклучок на Русија и Казахстан, на кои им беше дозволено мало зголемување на пумпањето.
ОПЕК + се определи за претпазлив пристап одлучувајќи да го зголеми производството за само 150.000 барели на ден во април, додека учесниците на пазарот очекуваа зголемување од 1,5 милиони барели на ден - вели Џовани Стауново, аналитичар за нафтените пазари во швајцарската УБС банка.
Инвеститорите исто така беа изненадени од одлуката на Саудиска Арабија да го продолжи своето доброволно намалување на производството од еден милион барели дневно над утврдената квота до април, иако цените на нафтата се зголемија во последните два месеци, поттикнати од економскиот оптимизам заради кампањата за вакцинација „Ковид-19“ околу светот.
Аналитичарите сега ги разгледуваат нивните претходни предвидувања за идните движења на цената на нафтата, земајќи го предвид продолжувањето на ограничените испораки на групата ОПЕК +, како и фактот дека американските производители на шкрилци ги „блокираат“ трошоците со цел да ги зголемат заработувачките на инвеститорите.