МВР официјално за тепачката пред Градска болница: Го прегазил детето во Шуто Оризари, а повикал полиција по нападот од таткото
Објавено во: Македонија 10 Август, 2020
МВР во денешниот полициски билтен објави дека пред тепачката кај Градската општа болница во Скопје, момчето поради кое избил инцидентот било прегазено во Шуто Оризари, а возачот кој го удрил пријавил во полиција откако бил нападнат од таткото додека биле во здравствената установа.
„На 09.08.2020 во 21.00 часот Б.К.(27) од Скопје пријавил дека околу 19.00 часот на ул.„11 Октомври“, пред Градската општа болница „Св.Наум Охридски“, бил физички нападнат од Џ.Б.(24) од Скопје. Според пријавеното, на нападот му претходела расправија поради претходно случена сообраќајна незгода во Шуто Оризари, во која бил повреден малолетник. Сочинет е записник за констатиран прекршок по чл.12 од ЗППЈРМ“, гласи во билтенот на МВР.
Синоќа беа приведени неколку лица по тепачката меѓу две семејства пред болницата за хируршки болести Св.Наум Охридски во центарот на Скопје, меѓу кои и таткото на прегазеното дете.
Таткото на детето почнал да го тепа човекот што го прегазил, кој исто така бил повреден при сообраќајката. Настанала општа тепачка, откако пријатели на оној што го прегазил детето дошле да се пресметаат со неговиот татко кој физички го нападнал. Тепачката се префрлила и во Градска болница. Затоа морале да интервенираат и медицински екипи.
Детето не е во животно загрозувачка состојба и е надвор од животна опаснст.