Мобилната лабораторија за испитување на квалитет на горивата и натаму вон употреба

Добивај вести на Viber

Мобилната лабораторија за испитување на квалитетот на течните горива односно на нафтата и нафтените деривати што ја купи државата пред седум месеци за 512.000 евра и натаму е вон употреба.

Пробиен е и рокот кој беше одреден до почетокот на оваа година, односно до средината на јануари. Иако беше набавена и промовирана во јуни годинава таа се уште не е во функција  Од Државниот пазарен инспекторат велат дека технички е испитана и ги дава резултатите за кратко време, но и натаму се чека да се земат првите примероци од нафтените трговци во редовна процедура.

- Инспекторатот редовно испитува одземени примероци од горивата, но во моментов не ги испитува со мобилната лабораторија. По завршувањето на празниците, во моментов се одржуваат состаноци на оваа тема и наскоро треба да биде познато кога ќе се стави во функција, ни одговорија од Државниот пазарен инспекторат.

Претходно Владата ги задолжи Бирото за метрологија, кое ја купи лабораторијата, и Државниот пазарен инспекторат да склучат договор за уредување на меѓусебните односи за начинот на користење и функционирање и со тоа колку што е можно побргу да биде ставена во функција.

Мобилната лабораторија треба да го испитува квалитетот на течни горива и степенот на емисија на штетните гасови што произлегуваат од нивното согорување за мошне брзо време на самото место и да ги детектира злоупотребите.  Бирото за метрологија и Државниот пазарен инспекторат се докажуваа кој треба да ја поседува и да ја користи, односно кој е надлежен да ја прави контролата, а долго се чекаше за нејзиното акредитирање.