Министерката на ВМРО-ДПМНЕ отишла во Заводот во Демир Капија и видела ужас
Објавено во: Македонија 16 Јануари, 2020
Министерката за труд
и социјална политика, Рашела Мизрахи, го посетила Специјалниот завод во Демир Капија, сакајќи на лице место да утврди и да се увери во какви
услови престојуваат штитениците на Заводот.
Од средба и разговорот со вработените била информирана за моменталната состојба во заводот. Од нејзиниот кабинет соопштија дека таму, од најавените реконструкции, видливи биле само искречените ѕидови.
„За хуманоста во условите во коишто престојуваат овие корисници не можам да зборувам. Овие услови се нехумани, нечовечни. Ова е чисто ужасие. Од најавените поправки на Специјалниот завод можеме да најдеме искречени ѕидови, додека инсталацијата водоводна, електрична е сѐ уште онаа од 56-та односно 58-ма година. Условите за хигиена се никакви, луѓето се препуштени сами на себе. Од помпезните најави можам да го кажам следново: на почетокот на владеењето на Социјалдемократскиот сојуз оваа установа имала 227 корисници со 41 неговател. Тоа значи еден неговател секој ден се грижел за 6 корисници. Мисијата е невозможна. На еден корисник треба да има еден негувател”, изјави министерката за труд и социјална политика Рашела Мизрахи по обиколката на Специјалниот завод.
Објавија и фотографии за да ги аргументираат овие тврдења.
Мизрахи рече дека ќе се заложи оваа состојба да се промени, а штитениците да ја добијат потребната грижа, нега и пред сѐ човечни услови за живот бидејќи секој заслужува да има пристоен живот.