Мицотакис ќе помогне за да добиеме датум за преговори
Објавено во: Македонија 14 Ноември, 2019
Јужниот сосед ќе помогне за добивање датум за почеток на преговори со ЕУ.
„Грција е влијателна земја во ЕУ и побарав да помогне за да добиеме датум за почеток на преговорите“, изјави премиерот Зоран Заев по средбата со неговиот грчки колега Кирјакос Мицотакис.
Заев добил позитивен одговор од Мицотакис дека ќе се бори за ЕУ интергациите на Македонија.
Имплементацијата на Преспанскиот договор била една од темите за кои разговарале со Мицотакис, но и за граничните премини, за меѓународната експертска група која треба да продолжи со разговорите за да ги најде прифатливите решенија за двете страни.
Премиерот Зоран Заев попладнево се сретна со поранешниот градоначалник на Солун, Јанис Бутарис.
„Добрите пријатели на нашата земја остануваат посветени на одржување и продлабочување на пријателските односи меѓу Северна Македонија и Грција. Секоја средба со поранешниот градоначалник на Солун Бутарис носи нешто ново. Ме извести дека идната недела ќе посети неколку градови во нашата земја како дел од програмата за поврзување на градовите од двете земји. Се согласивме дека секоја бизнис-инвестиција е инвестиција во пријателството за подобра заедничка иднина за граѓаните на двете земји“, објави Заев на Фејсбук.
Заев учествува на самит во Солун, и ќе се сретне и со бугарскиот премиер Бојко Борисов. Според најавите, зајакнувањето и имплементација на договорите со Грција и Бугарија ќе бидат во фокус на меѓупремиерските состаноци.