Македонските фирми ги вадат парите од банките за да можат да ја преживеат кризата!
Објавено во: Финансии 26 Февруари, 2013
Вкупните депозити во банките во јануари изнесуваат 3 милијарди 963 милиони евра. Според последните податоци што ги објави Народната Банка, во првиот месец од годинава во однос на декември се забележува намалување на салдото на вкупните депозити за речиси 2 милиони евра.
Анализирано од аспект на валутната структура, намалување има кај денарските депозити чие салдо во јануари изнесува 2,1 милијарда евра. За разлика од денарските, во јануари се забележува тренд на пораст кај девизните заштеди кои изнесуваат 1,8 милијарди евра.
Вкупни депозити 3,9 милијарди евра
Денарски депозити 2,1 милијарда евра
Девизни депозити 1,8 милијарди евра
Почетокот на годината е во знакот на топење на депозитната база на приватниот и јавниот сектор, додека кај домаќинствата се забележува раст на штедните влогови. Така вкупните депозити на приватниот и јавниот сектор изнесува 912 милиони евра и во однос на декември има намалување за 14,7 милиони евра.
И минатата година беше регистриран тренд на намалување на депозитната база на приватниот сектор. Како причина за ова, според економистите и банкарите беше кризата и влошената ликвидносна кондиција на фирмите кои ги повлекуваа депозитите за да ја амортизираат финансиската состојба.