Лукашенко го испитува пулсот на народот и повика на општа мобилизација

Добивај вести на Viber

Белорускиот претседател Александар Лукашенко најави општа мобилизација, но, не за војна. Тој го мобилизира населението за берба и други земјоделски работи.

Наредбата  до локалните началници низ Белорусија е да се мобилизираат сите што можат да работат на полињата.

„Прогласувам општа мобилизација! Мобилизирајте ги сите – средношколци, студенти, работници, државни службеници, јавни личности“, гласеше повикот на Лукашенко.

Како што објасни тој, сега е одлична можност за „добра заработка“, бидејќи житарките се бараат насекаде, има недостиг, па зошто да не се зајакне буџетот. Тој апелирајќи да не се изгуби ниту едно зрно, домат или компир, бидејќи тоа значи губење на неопходните евра, долари или рубли за белоруската економија.

„Ако човек работи 5-6 часа на терен, сите ќе бидат задоволни, и родителите и државата, а децата ќе имаат корист од свежиот воздух, ќе станат физички посилни“, вели Лукашенко.

Но некои од белоруските медиуми шпекулираат дека Лукашенко, всушност, сака да провери колку луѓе се способни за војна. 

Лукашенко, како што јави белоруската новинска агенција Белта, изјавил дека е верен сојузник на Русија и дека нема да дозволи воените операции да се префрлат на територијата на Белорусија, а нивната задача е да се погрижат Русија да не биде загрозена од Полска, Литванија и Летонија. 

Белорусија од самиот почеток на инвазијата на Украина дава поддршка на Русија. Русија има проблеми со мобилизацијата. 

Фото: Интернет-страница на белорускиот претседател