Курти: Владите на Косово, Црна Гора и Северна Македонија ќе седнат заедно
Објавено во: Балкан 25 Февруари, 2020
Премиерот на Косово, Албин Курти, рече дека зборувал на состанокот во Лондон за важноста на инвестирањето во економијата и младинското претприемништво. Владата на Приштина ќе соработува со Владата на Црна Гора и Владата на Северна Македонија, потврди Курти.
Премиерот на Косово, Албин Курти, кој е во Лондон на Инвестицискиот самит на Европската банка за обнова и развој, најави дека планира да организира заеднички седници со црногорската и северно-македонската влада, пренесува Танјуг.
„Веќе имаме постигнато 77 договори со Албанија. Ќе одадеме нова енергија и динамика на нивната имплементација“, објави Курти на Фејсбук.
Тој најави дека приштинската влада ќе соработува со Владата на Црна Гора и Владата на Северна Македонија во проекти од заеднички интерес.
„Ние, исто така, имаме намера да имаме заеднички седници со нив“, рече Курти.
Тој исто така потврди дека зборувал на состаноците во Лондон за важноста на инвестирањето во економијата, младинското претприемништво, информатичката технологија и инфраструктурата, како и односите со Србија и принципот на реципроцитет.