КРИВИЧНА ПРИЈАВА ЗА ВРАБОТЕН ВО МВР - наместо на жиро сметка, парите си ги присвојувал

Добивај вести на Viber

Двеипол години вработен во Министерството за внатрешни работи си присвојувал пари наместо да ги уплати на жиро сметката на МВР. 

Како што соопштуваат од министерството, вработениот бил во сектор Оддел за граѓански работи - Отсек за оружје, експлозивни и опасни материи Охрид и тој наместо да им помогне на граѓаните да уплатат на жиро сметка, им советувал парите да му ги дадат нему, по што си ги присвојувал. 

- Одделот за внатрешна контрола, криминалистички истраги и професионални стандарди при Министерството за внатрешни работи до Основното јавно обвинителство Дебар поднел кривична пријава против Љ.З. вработен во Отсек за оружје, експлозивни и опасни материи - Охрид, Сектор за оружје, експлозивни и опасни материи при Оддел за граѓански работи, поради постоење на основи на сомнение дека сторил кривично дело „злоупотреба на службената положба“ по член 353 од Кривичниот законик во врска со член 9 став 5 од Законот за оружје и член 6 и член 7 од Законот за административни такси во МВР - соопштуваат од министерството.

Пријавениот Љ.З., во својство на одговорно лице, соопштуваат од МВР, во периодот од 01.01.2022 до 05.08.2024 од барателите, на рака ги земал парите што требало да ги платат на жиро сметката на Министерството за внатрешни работи за административни такси, со цел да им врши услуга, односно во нивно име тој да изврши уплата за административни такси.

- Но, наместо тоа, парите тој противправно ги присвоил и со тоа за себе прибавил имотна корист и нанел штета на Буџетот на Министерството за внатрешни работи во износ од 60.950 денари. Во наведениот период, за вкупно 179 примени барања нема потврда за платени административни такси. Поради потешко кршење на работниот ред и дисциплина, Одделот за внатрешна контрола против Љ.З. ќе поднесе и предлог за поведување на постапка за утврдување на дисциплинска одговорност и ќе изрече задолжителни мерки за отстранување од работното место до донесување на решение во дисциплинската постапка - се појаснува во соопштението од МВР.