КОЛКУ СИЛНО ЌЕ УДРИ КОРОНА - туризмот брои штети, кожарите во грч, за власта е рано да се зборува за последици

Добивај вести на Viber

Колку силно коронавирусот ќе удри врз домашната економија, засега никој не сака да прогнозира. Дел од бизнисот, особено туристичката дејност, веќе почна да брои штети, а дел како што е кожарската и чевларската индустрија, во грч ги следат состојбите.

Туризмот веќе почна да ги книжи загубите. Аранжманите за 8 Март за Италија се откажани, а поради паника има обиди за откажување и на аранжманите за другите региони. Од Стопанската комора за туризам велат дека туристичките компании веќе трпат штети, па апелираа дека во моментот не е потребна паника, туку конкретни акции. Ги прозваа и надлежните министерства зошто не им даваат конкретни насоки како да постапуваат во вакви ситуации. Побараа од Министерството за транспорт и врски, заедно со авиокомпанијата „Визер“ да заземат став за пролонгирање или рефундирање на уплатените средства за авионски карти за Италија, со цел да се обештетат патниците.

Она што е најголем проблем за комората, е што нивните партнери од Рим не сакале да им ги вратат веќе уплатените средства за хотелско сместување, што значи дека тоа ќе падне на товар на самите агенции. „Само за северна Италија имаме поврат на средства. Бараме барем ‚Визер' да ни излезе во пресрет, бидејќи зема субвенции од државата. Двете опции се на маса“, рече Емил Димитровски, претседател на комората.

Наводно, веќе се откажувале и аранжмани и за земји каде што воопшто нема заразени од коронавирус.

А загрижувачки најави стигнаа и од кожарската индустрија. Доколку се искомплицира ситуацијата со коронавирусот во Италија, може да замре таа индустрија во кумановско, изјави деновиве претседателот на здружението на текстилна и кожарска индустрија Ангел Димитров

„Најголемиот дел од компаниите работат за италијански партнери и се под закана дека нема да можат да обезбедат суровини и да ги пласираат своите производи, ако се влоши состојбата со коронавирусот во Италија. Тоа ќе биде повод за затворање на повеќето компании“, изјви Димитров.

ЌЕ ПАТИ И СВЕТСКОТО СТОПАНСТВО, НЕ САМО МАКЕДОНСКОТО

И странските компании што работат во земјава се свесни дека коронавирусот е глобална криза и тоа нема да предизвика застој само во Северна Македонија, туку во стопанството во целиот свет. Директорот на Делегацијата на германското стопанство во државава, Патрик Мартенс смета дека во овој период е особено важно да останеме со студени глави.

„Да, ќе има делумно влијание на стопанството во Македонија. Но, сметам дека македонското стопанството во брз и краток рок ќе успее да се опорави од тоа. Поголемиот проблем со кој се соочуваме моментно во земјата е недостигот на стручен работен кадар“, изјави вчера Мартенс за новинарите.

А по информацијата за привиот случај на корона во земјава видно паднаа и акциите на компаниите кои котираат на Македонската берза. Вчера немаше ниту една акција која забележа раст, и тоа беше трет ден по ред како компаниите губеа од вредноста. 

Министерката за финансии Нина Ангеловска, пак, неодамна изјави дека се уште е рано да се зборува за последиците на нашата економија од коронавирусот. „Од економската гледна точка е рано да се прават какви било предвидувања, а овие состојби ја следат и глобалната економија, со цел да се преземат и одредени активности“, изјави вчера Ангеловска.

Н.Н.Ф.