Кој охридски хотелиер во претсезона направи приход вреден еден милион евра?

Добивај вести на Viber

„Хотели Метропол“ годинава ги зголеми за 25 отсто трошоците за своите вработени што е и логичен и очекуван потег со оглед на побарувачката за угостителски работници на јадранската ривиера. Во такви услови приходите на хотелите се зголемени за 15 отсто, трошоците пораснале само 6 отсто, а загубата во предсезона иако постои е за речиси 30 отсто помала од лани

Најголемиот охридски хотелиер „Хотели Метропол“ во првата половина од годинава, всушност во кварталот што го нарекуваат предсезона, успеа да направи подобар резултат од претходната година. За првите шест месеци охридските хотели „Белви“, „Метропол“ и „Турист“ остварија приход безмалку еден милион евра. Во споредба со истиот период претходната година овие хотели имаат приход што е повисок за 15 отсто односно 134.000 евра повеќе од лани.

И покрај подобрувањето на резултатот во претсезона оваа туристичка компанија годинава во првите шест месеци прикажа загуба од оперативното работење, но таа е значајно пониска од загубата во претсезоната лани. За првите шест месеци „Хотели Метропол“ имаат загуба од 194.000 евра односно 25 отсто помалку од истиот период лани.

Оперативните трошоци на компанијата за шест месеци изнесуваат 1,17 милиони евра, што е за 6 отсто повеќе од претходната година. Најголема трошковна ставка во структурата на расходи се трошоците за вработените. За нив компанијата плати 583.000 евра односно 25 отсто повеќе од истиот период лани. Очигледно дека „Хотели Метрополи“ ставиле приоритет на својата кадровска политика и посветиле внимание да ги задржат своите вработени и подобро да ги мотивираат. Особено сега кога е голем предизвикот и побарувачката за квалитетен угостителски кадар на хрватското и црногорското крајбрежје.

 Веројанто за анулирање на таа опасност менаџерите и сопствениците на овие охридски хотели биле подарежливи кон своите вработени.
Втора најголема расходна ставка се трошоците за суровини и други материјали за кои компанијата издвоила 300.000 евра за шест месеци.

„Хотели Метропол“ полугодието го завршил со загуба од 175.000 евра откако ја ублажил оперативната загуба со позитивната разлика меѓу финансиските приходи и финансиските расходи.

Вредно за истакнување, од аспект на инвеститорските интереси за таа акција, дека оваа компанија во првите шест месеци годинава ја удвои својата изложеност односно обврски. На крајот на јуни годинава тие изнесуваат 1,2 милиони евра, а на крај на јуни лани биле 585.000 евра.

Охридските хотели од компанијата „Хотели Метропол“ се најголема хотелска компанија на ривиерата затоа што располагаа со над 770 кревети. Доминантен сопственик на оваа компанија е скопската шпедиција „Фершпед“.

foto freepik.com