Кој ќе земе 13 милиони евра да ја контролира градбата на автопатот Кичево – Охрид?
Објавено во: Економија 11 Декември, 2018
Со најновиот договот за дополнителни услуги надзорот за изградбата на најскапиот македонски автопат ќе чини повеќе од 13 милиони евра. По првичниот договор на вредност од 10 милиони евра, сега со непосредна спогодба Јавното претпријатие за државни патишта работата повторно ја даде на носителот на набавка Градежен институт Македонија за 3 милиони евра
Градежен институт „Македонија“ (ГИМ) е носител на набавката во која ќе добие 3 милиони евра од Јавното претпријатие за државни патишта (ЈПДП) за дополнителни услуги за надзор врз изградбата на автопатот Кичево – Охрид. ЈПДП и ГИМ склучија договор во постапка со преговарање без да биде објавен оглас. Со оваа набавка што ја доби ГИМ вкупната вредност на бизнисот што го имаат за надзор врз изградбата на автопатот надмина 13,1 милиони евра.
Деталите за тоа зошто ЈПДП одел на избор со преговарање без објава на тендер се достапни на следниот линк.
Според официјалните достапни објавени податоци (кои можат да се најдат на агрегаторот time.mk) се гледа дека ГИМ е носител на набавката и настапува заедно со две друштва со ограничена одговорност и тоа: Евро консалтинг ДОО Скопје и ГЕИНГ Кребс унд Кифер Интернешнл ДОО Скопје.
Всушност наједноставно речено новата набавка остварена со постапка за преговарање значи анекс на договорот што ГИМ го има со ЈПДП и се однесува на надзор врз изградбата на новиот автопат. Договорот меѓу ЈПДП и ГИМ и партнерите ќе важи од 15 ноември до 30 јуни 2023 година. Со новите детали од договорот е уредено дека надзорот е ангажиран во фазата пред изградба (3 месеци), фазата на изградба до 30 јуни 2021 година и фазата по изградба во кои е офатен гарантен период од 24 месеци заклучно со 30 јуни 2024 година.
Кој е ГИМ?
ГИМ е акционерско друштво кое лани имало приходи од продажба во износ од 7,95 милиони евра. Нето добивката на крајот на минатата година му е 1 милион евра. Основни дејности на ГИМ се техничките испитувања и анализи и архитектонски и инженерски активности и соодветни технички услуги. ГИМ е средно голема македонска компанија која лани вработувала 263 лица. ГИМ има два доминантни акционери од кои првиот е „Сервис Петрол ДОО“ Скопје со 43,78 отсто од акциите со право на глас и „АУТО АС ДОО“ Скопје со 39,3 отсто сопственост врз акциите.
Р.Ф.