КОИ ЌЕ БИДАТ НОВИТЕ МИНИСТРИ - почнуваат преговорите за пополнување на Илинденска

Добивај вести на Viber

Можеби и досега разговараа далеку од очите на јавноста, но од денеска почнуваат и официјално преговорите за обезбедување на новото парламентарно мнозинство, како и за новата Влада.

Партиите, како што во повеќе наврати од нив побара и меѓународната заедница, ќе мора да постигнат договор и да обезбедат стабилна влада, која ќе оди по зацртаниот пат на евроинтеграциите. 

По изборите партиите неформално го опипуваа пулсот на политичката сцена, па се очекува во наредниот период да ги интензивираат контактите во насока на обезбедување на минимум 61 пратеник за добивање на мандат од претседателот Стево Пендаровски за составување на владиниот кабинет.

Паралелно ќе тече и поделбата на министерските места, како и одредувањето на кадровските решенија за тоа кој ќе седне во зградата на Илинденскса. Ќе се разговара и за директорските места на јавните институции, зависно од тоа кои партии ќе ја прават Владата.

Лидерот на СДСМ, Зоран Заев, со преговори за нова влада, како што најави и по изборите, ќе почне по Илинден. Во интервју за хрватскиот неделник „Национал“ пред десетина дена, тој рече дека СДСМ има убедливо најголем коалициски потенцијал. 

„Мандатот за формирање на нова Влада е кај СДСМ и коалицијата „Можеме“. Веднаш по празникот Илинден, ќе влеземе во процес на преговори за идно коалицирање и формирање состав на Влада“, рече тогаш Заев.

Тој најави дека ќе разговараат за коалицирање со сите партии што се подготвени да го прифатат европскиот, демократскиот, слободарскиот, напредниот концепт и патот што Северна Македонија го оди како земја членка на НАТО. За „структурите кои заговараат идеи различни од демократскиот и европскиот концепт“, како што рече Заев, не може да бидат дел од идната владејачка коалиција водена од СДСМ.

Лидерот на ВМРО-ДПМНЕ, Христијан Мицкоски, пак, завчера во обраќањето по повод двата Илиндена од струшко Ташмаруништа, повтори дека „ќе учествува во натпреварот за формирање влада што се игра до последна минута“.

Мицкоски минатата недела рече дека не поддржува широка коалиција и смета оти таквата Влада ќе биде неефикасна, како што се покажало и докажало и со техничката влада. Во таа прилика истакна дека нема ништо конкретно околу преговорите за нова Влада и оти досега се сведува на „мерење на политичките сили“. Тој оцени дека не би се изненадил ако никој не успее да формира влада и не ја исклучува можноста за нови парламентарни избори наесен.

Н.Н.Ф.