Клиниката во Штип ќе биде база за изолација на евентуално заразените од корона во Македонија

Добивај вести на Viber

Инфективната клиничка болница во Штип ќе биде базата во која ќе се изолираат болните и сомнителните случаи заразени од коронавирусот во Македонија, соопшти Венко Филипле, министерот за здравство, по состанокот на Комисијата за заразни болести.

Истовремено е одлучено тестирањата на сомнителни случаи да се вршат на Инфективните клиники во Скопје и во Куманово, по подигнувањето на степенот на подготвеност за превенција од и справување со евентуални заболени од коронавирусот. поради новонастаната состојба во областите Ломбардија, Венето и Емилија-Ромања во Италија.

„Комисијата донесе нови, зајакнати мерки за превенција од и справување со евентуални заболени, кои дополнително ќе бидат координирани на денешниот состанок со Центарот за управување со кризи (ЦУК) во Министерството за внатрешни работи, закажан за 17 часот. Првичните заклучоци од состанокот на Комисијата за заразни болести се дека се засилува контролата на сите гранични премини и на двата аеродроми во земјата“, објави Филипче.

На граничните премини се отстапуваат посебни простории каде ќе бидат интервјуирани сите патници кои доаѓаат од ризичните дестинации и ќе се врши првичен скрининг на нивната здравствена состојба. На Скопскиот аеродром, термалната камера се поставува на локација од која ќе се следат сите патници кои пристигнуваат, а не како досега само патниците од Дубаи и Истанбул. Со безконтактен пиштол за мерење на телесната температура ќе се прави скрининг на патниците кои ќе пристигнат на од ризични дестинации и на аеродромот во Охрид.