Ќе се одложи враќањето на бескаматните кредити, некои фирми ќе добијат и грантови: Мерките во финална фаза
Објавено во: Економија 26 Септември, 2020
Ќе се зголеми грејс периодот кај бескаматните кредити од КОВИД 1 и дополнително ќе се одложи отплата на кредитите на компаниите. Ова ќе биде дел од четвртиот пакет мерки кои Владата треба да ги усвои утре. Денеска дел од мерките биле разгледани на економско-социјалниот совет. Четвртиот пакет економски мерки опфаќа и поддршка за исплата на плати за последниот квартал на годината, платежни картички за одредени категории на граѓани на кои помошта им е најпотребна. Ќе има и грантови за најпогодените сектори, намалување или укинување на парафискални давачки.
Потпретседателот на Владата, Фатмир Битиќи посочил дека четвртиот пакет економски мерки тежок 350 милиони евра е продолжение на претходните три пакети и е сублимирање на анализите направени преку консултациите со сите засегнати чинители во општеството, со цел опфатот во овој пакет да биде насочен кон поддршка и помош на најпогодените сектори и категории на граѓани.
На седницата присуствуваа министерката за труд и социјална политика, Јагода Шахпаска како претседателка, Битиќи, но и министерот за финансии, Фатмир Бесими.
„Од страна на членовите на Економско-социјалниот совет беше констатирано дека четвртиот пакет економски мерки е доста обемен, со оглед на тоа дека се опфатени и компаниите со цел поддршка за нивни опстанок во време на корона пандемијата, задржување на работните места и поддршка на граѓаните, стои во соопштението.