Институцијата без прв човек: Како се трошело во ДЗР
Објавено во: Економија 09 Октомври, 2019
Државниот завод за ревизија остана обезглавен, а поради политичките пазарања во собраниските комисии оваа институција која е најважна во контролата на јавните финансии практично и да не функционира по 4 октомври кога му истече мандатот на заменикот Насер Адеми.
Како ќе се реши оваа ситуација? Му одговара ли на некој оваа институција да не работи? Одговорите можеби и нема да ги има наскоро, а во Македонија следната година е изборна година. Додека траат овие политички калкулации со оваа чувствителна тема Фактор анализира како финансиски функционирал Државниот завод за ревизија минатата година. Дел од вработените таму обвинуваа дека Адеми прави унапредувања и трансфери за кои нема надлежности. Во 2018 година или во негово време ДЗР потрошил безмалку милион ипол евра, од кои најголем дел се трошоци за плати на вработените. За оваа намена одвоени се 1,17 милиони евра или над два проценти повеќе од претхдоната 2017 година.
Со вселувањето во новиот објект, расходите за комунални услуги и греење на ДЗР се зголемиле и учествуваат со 5 отсто во вкупните расходи на ДЗР. За оваа намена потрошени се вкупно 73 илјади евра или девет отсто повеќе од претходната година. Капиталните инвестиции се реализирани со само еден процент, а тоа се должи на тоа што и покрај планираната набавка на информатичка опрема, компанијата која била избрана за најповолен понудувач не успела да ја реализира, па парите биле вратени во буџетот.
Она што е најинтересно е ставката трансфери која во 2018 година е зголемена за речиси 700 отсто. Или ако трансферите во 2017 година изнесуваат 30.000 денари, во 2018 година се 208.221 денари. Не се образложува што отпаѓа на овие разни трансфери. За повеќе од 20 отсто зголемени се и расходите за материјали и ситен инвентар и за поправки.
А.Т.