Инспектори проверуваа во какви услови се лекува Боки 13 во Шутка, 25 пати бил во болница
Објавено во: Македонија 21 Ноември, 2019
Инспектори од Државниот санитарен и здравствен инспекторат извршиле вонреден надзор во истражниот затвор во Шуто Оризари за да проверат во какви услови се лекува и прегледува Бојан Јовановски, кој е во притвор како обвинет во случајот „Рекет“. Инспекторите информираат дека не се констатирани недостатоци од она што е во рамките на нивните надлежности.
ДСЗИ соопшти дека вчера цел на проверка била ординацијата која се наоѓа во рамки на КПУ Затвор Скопје. Истата е дел од ЈЗУ Здравствен дом Скопје, па според тоа овој инспекторат имал надлежност на самото место да ги провери тврдењата на одбраната на Боки 13, дека кон него се води лекарска негрижа во ситуација, како што велат тие, кога тој е во тешка здравствена состојба. Според евиденцијата на инспекторатот, може да се заклучи дека до сега шоуменот за четири месеци дури 25 пати бил испраќан од притворот во болница.
„Од извршениот увид во медицинската документација притворениот Ј.Б. прв пат побарал лекарска помош на ден 16 јули, при што е прегледан и ординирана му е терапија. Во периодот од 16 јули до 13 ноември за пациентот евидентирани се вкупно 25 прегледи, при што се издавани специјалистички и болнички упати до здравствени установи на секундарно и терциерно ниво (болнички здравствени установи)“, се вели во соопштението на ДСЗИ.
Од таму констатираат дека упатите се давани со претходно медицинско известување до надлежниот суд за добивање на согласност за понатамошно лекување, но во дел од случаите пациентот е пратен со Итна медицинска помош до одредена здравствена установа во интерес на побрзо добивање здравствена услуга, за што постои уредна евиденција.