Има основи за напредок, тврдат од СДСМ и ДУИ по средбата на Заев и Ахмети
Објавено во: Македонија 13 Август, 2020
Има добри основи за напредок во преговорите меѓу СДСМ и ДУИ.
Заврши работната средба меѓу претседателите на СДСМ и ДУИ, Зоран Заев и Али Ахмети и генералните секретари на партиите Љупчо Николовски и Артан Груби.
Од заедничкото соопштение на двете партии се вели дека средбата била продуктивна и дека постигнати се основи за напредок кој води до коалиционен договор.
„На тричасовната конструктивна и продуктивна средба постигнати се основи за напредок кој води до коалиционен договор за нова, европска Влада посветена на европските интеграции, на економијата, еднаквоста и на владеењето на правото. Разговорите меѓу двете партии ќе продолжат во текот на викендот на ниво на генерални секретари“, соопштија СДСМ и ДУИ.
Средбата се случи по денешното доделување на мандатот на Заев. Тој сега има рок од 20 дена да се обиде да обезбеди мнозинство.