15 Јуни, 2021
0.0374

КОИ СЕ СТРУМИЧКИТЕ ФИРМИ ЗА КОИ ПРОГОВОРИ КОСТОВСКИ - од СДСМ велат: немаме ништо со лошото работење на Еуростандард

Објавено во: Економија 20 Октомври, 2020

Кои се струмичките компании каде наводно биле одлевани пари од Еуростандард банката на бизнисменот Трифун Костовски, на која Народна банка и ја одзеде дозволата за работа и врз неа беше отворена стечајна постапка.

Од владејачката СДСМ за Фактор тврдат дека немаат никаква поврзаност ниту со Трифун Костовски, ниту со причините за пропаѓањето на неговата банка. Сметаат дека партијата не треба да се вмешува, а го упатуваат Костовски или било кој друг, сите евентуални наводи за сомнително работење да се достават до надлежните институции.

Ако опозициската ВМРО-ДПМНЕ досега на неколку последователни пресконференции откако пропадна банката ги споменуваше струмичките компании, поврзувајќи ги нив со Еуростандард, вчера тоа го стори и самиот сопственик, Костовски. Рече дека многу средства од банката отишле токму во струмичкиот регион, а тоа се случило благодарение на поранешниот прв човек на неговата банка, Николче Петковски, кој „бил припадник на СДСМ и одработувал за СДСМ“.

Навистина шокантно тврдење на Костовски, кој откако банката доживеа колапс, постојано за тоа ја обвинуваше Народна банка, став на кој стои и сега, нагласувајќи дека монетарната власт можела да дозволи да се спаси банката, како и да преземе други мерки пред да и ја одземе дозволата, а не сакала да му даде шанса ниту на потенцијалниот инвеститор кој бил подготвен да ја купи.  

Сепак, Костовски во своите досегашни настапи не сакаше гласно да зборува за можна улога и на владејачки структури во пропаста на банката. 

Иако, во изјава за Фактор пред неколку дена, кога НБМ поднесе кривична пријава против поранешни сопственици на банката, тој рече дека власта кумувала на тој процес. Вчера, пак, отиде и чекор подалеку, прозивајќи го директно СДСМ и споменувајќи струмички фирми.

Фактор праша во владејачката СДСМ како ги коментираат наводите на Костовски. Поточно, до партијата на власт ги упативме следниве прашања:

Дали е точно дека Николче Петковски е член на СДСМ?Дали е точно дека како прв човек на банката одработувал за СДСМ, односно дека преку него се одлевале пари во фирми од струмичкиот регион? Дали имаат сознанија за кои струмички компании се работи и ако нема такви, зошто упорно ги споменува Трифун Костовски? Дали имаат сознанија кои се фирмите поради кои е заглавена банката, односно не ги враќале своите кредити? Дали компанијата „Галафарм“ која ја споменува Костовски е на било каков начин поврзана со СДСМ? Како СДСМ како владејачка партија ќе им помогне на штедачите кои заглавија во Еуростандард банка со големи суми пари, со оглед што од Владата веќе се изјаснија дека посебен закон за нивно обештетување не може да се носи?

Еве какви одговори добивме од СДСМ.

„СДСМ категорично отфрла каква било поврзаност со Трифун Костовски и причините за неуспешното работење на Еуростандард банка. Оттука обидите партијата да се вмешува во овој случај ги сметаме за крајно манипулативни и тенденциозни. Потсетуваме дека има надлежни институции и охрабруваме било кој да ги пријави сите наводи и јавноста да ги добие сите одговори врз јасна транспарента постапка“, е кусиот став кој го добивме од СДСМ, иако Фактор замоли за подетални одговори на нашите прашања.

Фактор побара став и од поранешниот претседател на Управниот одбор на банката, Николче Петковски, кого Костовски упорно го посочува како главен виновник, и кој уште на стартот на овој случај пред јавноста излезе со тврдење дека немало ништо незаконско во неговото работење.

Петковски вчера рече дека едноставно не сака ниту да коментира, ниту да демантира. За него обвинувањата од Костовски се небулози, со кои „некој сака да биде во центарот на вниманието“.

„Нека проверат новинарите дали јас имам членска книшка на СДСМ. Јас не сум член на СДСМ. Не е точно дека се фрлани пари од банката во струмички фирми. Сепак, јас не сакам да ги коментирам овие наводи, не сакам да влезам во таква дебата. Си има надлежни органи, си има стечаен управник на банката. Јас кажав што имав да кажам во моето првично соопштение и останувам на тоа“, вели кусо Петковски за Фактор, на нашето инсистирање дека е прозван во овој случај и треба да се произнесе.

А еве што точно вчера кажа бизнисменот Костовски.

Денеска сфаќам дека најмалку работел за нас (Петковски - н.з.). Одработувал за себе и за некои други. Политички партии се во прашање“, рече Костовски. Прашан за кои политички партии, дали за сите, тој нагласи дека Петковски бил член на СДСМ и дека пари се одлевале во струмичкиот регион.

„Па не за сите, бидејќи тој е припадник на Социјалдемократскиот сојуз. Бидејќи, големи средства од банката се во тој регион, во струмичкиот, во Галафарм, фирма која од самиот почеток требала да биде банкрот, меѓутоа упорно, упорно у упорно таму се пикале пари“, рече Костовски.

Инаку, без разлика на кој регион припаѓале фирмите, јавноста ќе ги очекува одговорите кои се тие компании кои сега не можат да вратат заеми од дури 55 милиони евра, зошто тие кредити не биле обезбедени со хипотеки или други начини, бидејќи на крајот од денот, најголема штета од ова несовесно работење, имаат штедачите на Еуростандард банка. 

Надзорна комисија во Собеанието ќе расправа за случајот Еуростандард банка, а според очекувањата на претседателот на собраниската комисија за финансирање и буџет, Тимчо Муцунски, тоа ќе се случи најверојатно на стартот на идниот месец. 

Нина Нинеска-Фиданоска

Можеби ќе ве интересира

Пентхаус во Мајами Бич е најскапиот имот платен во криптовалути

Пентхаус во Мајами Бич е најскапиот имот платен во криптовалути

Министерот Бектеши ја посети подружницата на Алкалоид во Киев

Министерот Бектеши ја посети подружницата на Алкалоид во Киев

Вредноста на биткоинот надмина 40.000 долари

Вредноста на биткоинот надмина 40.000 долари

Понизок ДДВ за сметките на струја за да нема поскапување: Само да не блокира Мицкоски, вели премиерот

Понизок ДДВ за сметките на струја за да нема поскапување: Само да не блокира Мицкоски, вели премиерот

МАПАС со порака до граѓаните - Информирај се навременo за својата пензија

МАПАС со порака до граѓаните - Информирај се навременo за својата пензија

ВЛАДАТА ВОВЕДУВА НОВА ТАКСА: Плус 3,5 денари за литар на бензините и дизелот

ВЛАДАТА ВОВЕДУВА НОВА ТАКСА: Плус 3,5 денари за литар на бензините и дизелот

ПРВИОТ ЧОВЕК НА ТАВ, САНИ ШЕНЕР: Ќе требаат уште еден до два месеци за да се воведе стандард за летање во сите земји, ја корегиравме веста за Германија

ПРВИОТ ЧОВЕК НА ТАВ, САНИ ШЕНЕР: Ќе требаат уште еден до два месеци за да се воведе стандард за летање во сите земји, ја корегиравме веста за Германија

ФИТР за прв пат инвестира во 4 компании за развој на дигитализација на земјоделството

ФИТР за прв пат инвестира во 4 компании за развој на дигитализација на земјоделството

Ќе ги спасат ли ваучерите: Какви се приходите на најпознатите хотелиери

Ќе ги спасат ли ваучерите: Какви се приходите на најпознатите хотелиери