И НА ВОДНО МОЖЕ ДА БИДЕ РИЗИЧНО - повреден планинар, а излетал и автомобилот што дошол да го спаси
Објавено во: Македонија 26 Јануари, 2020
Качувањето по најпопуларната рекреативна дестинација на скопските планинари, знае да биде и ризично.
Вчера планинар кој се качувал на Водно бил повреден, иако се уште нема детали како тоа се случило.
Но, тука не завршиле проблемите. Напротив, уште повеќе се сголемиле. Имено, на помош сакало да му дојде возило на Црвен крст, но тоа излетало од патот и не успеало да дојде до повредениот планинар.
Затоа на крајот бил извлечен од екипи на противпожарната бригада.
Овие детали ги раскажаа од МВР во својот билтен.
„На 25.01.2020 во 15,35 часот Т.Б. од Црвен крст во СВР Скопје пријавила дека над детското одмаралиште на Водно, додека се обидувале да стигнат до повредено лице на патеката, патничко моторно возило на Црвен крст “дачиа дастер“ излетало од патот и не биле во можност да пристапат до повреденото лице. Од екипа на противпожарната бригада повредениот Г.С.(52) од Скопје бил извлечен, по што бил пренесен во комплексот клиники “Мајка Тереза“ за укажување на лекарска помош, и од страна на лекар констатирана била тешка телесна повреда што ја здобил додека се движел на Водно“, пишува во билтенот на МВР.
Нема повеќе детали каква била повредата, како дошло до неа, и каква е моментално здравствената состојба на повредениот планинар.