07 Март, 2021
0.0207

И костените во Македонија ги зафати „пандемија“

Објавено во: Агробизнис 30 Декември, 2020

И костените во Македонија ги зафати „пандемија“, велат од Институтот за одржлив рурален регионален развој „Бела виста“ од Тетово, објаснувајќи дека дрвјата се на удар на паразити, и треба да се преземат мерки за нивна заштита.

Оваа појава не е нова и трае веќе 40 години, но општеството и државата досега не вложиле напори за заштита на костеновите дрвја. Доколку на болеста не ѝ се застане на патот, со низа мерки и научен пристап, во иднина многу од стеблата ќе бидат уништени, а родот драстично помал. Од „Бела виста“ велат дека имаат програми и проекти со кои можат да помогнат да се санираат штетите и да се создадат насоки за менаџирање на оваа гранка во иднина.

„За колку време паразитот ќе го уништи дрвото зависи од многу фактори, пред сè од отпорноста на самото дрво, колку е големо, од временските услови. Но, за 4 до 5 години паразитот може да го уништи дрвото. Подигање на нови насади нема, затоа што дрвјата ги напаѓаат болести, и луѓето не го гледаат ова како нешто одржливо. Костените се генерално на приватни имоти, а многу мал дел се во државни шуми“, вели Сашо Матовски, претседател на „Бела виста“.

Костените во земјава се концетрирани во најголем дел во тетовско, а помал дел во мавровско и дебарско. Оваа година, имаше за нијанса подобар род од претходните години, а бидејќи голем дел од костените не се извезени во странство, на пазарите за Божиќ ќе има евтини и квалитетни костени. За големиот христијански празник, костените се задолжителни на трпезата.

„Цените по пазарите во Македонија ќе бидат пристапни за граѓаните, но тоа пак не е добро за оние кои ги одгледуваат костените“, рече Матовски.

Климатските промени си го направија своето и создаваат штети на оваа гранка. Друг проблем кој ги мачи сопствениците на костени се крадците многу често им го собираат родот.

Сања Атанасовска