Добивај вести на Viber
Претседателот на ВМРО-ДПМНЕ, Христијан Мицкоски, побара од претседателот Стево Пендаровски да не ги потпишува законите кои денеска беа изгласани на собраниската седница на која беа усвоени решенијата кои вклучуваат финансиска помош и даночни олеснувања.
„Претседателе Пендаровски, доста се криеш, бекни нешто. Застани зад правото, законите и Уставот. Тоа што Заев дозволил да биде заложник на Талат Џафери, тоа што пратениците од СДСМ одлучија да бидат слуги на инаетот и фрустрацијата на еден човек, нека биде нивен срам, ти имаш можност барем еднаш да покажеш дека си достоен за функцијата која ја извршуваш и не ги потпишувај законите кои се резултат на оваа седница.
Пратеничката група на коалицијата за Обнова на Македонија предводена од ВМРО-ДПМНЕ ќе поднесе кривични пријави за сите оние кои денес го прекршија законот поради инаетот и фрустрацијата на еден човек, а обвинителството има можност првпат да покаже дека не се робови на Зоран Заев и владиното мнозинство. Правда ќе има со ова или некое друго ослободено обвинителство. Сторителите ќе одговараат, Ви ветувам лично дека тие ќе одговараат од прв до последен“, напиша Мицкоски на Фејсбук.
Лидерот на најголемата опозициска партија смета дека гласањето било незаконско, затоа што на седницата присуствуваа двајца пратеници на владеачкото мнозинство кои дојдоа како позитивни на Ковид-19 и гласаа од кабината.