ГРЦИТЕ ПОПУШТААТ: Aнкета открива какво решение за граѓаните е прифатливо
Објавено во: Балкан 22 Март, 2018
Во Грција 56,5 проценти од граѓаните се против терминот „Македонија“ да биде дел од решението за името, покажува истражувањето на агенцијата „Капа рисрч“ напревено за грчката ТВ Алфа.
Но, овие податоци покажуваат големо намалување на отпорот на Грците кон терминот „Македонија“, затоа што истражување на солунскиот универзитет објавено во весникот Катимерини пред само еден месец покажуваше дека 72 проценти од Грците се противат во решението да има и збор „Македонија“.
Според новото истражување, 40 % од Грците мислат дека решение без „Македонија“ во името не е можно. Грчките медиуми пишуваат дека преговорите за името влегуваат во клучна фаза. Весникот Катимерини анализира дека позициите на Атина во грчката нацрт спогодба се горе-долу познати и вклучуваат седум точки, а за три од нив постои договор, „за името (веројатно „Горна Македонија“), за акронимите и за иредентистичките наводи“.
Грчкиот шеф на дипломатијата, Никос Коѕијас денеска ќе пристигне во Скопје.
Стејт департментот укажа дека САД се надеваат на брзо решeние на долготрајниот спор со името.
„Се надеваме дека лидерите на Македонија и Грција ќе постигнат заеднички прифатливо решение во интерес на евроатлантските интеграции, економскиот просперитет, мирот и безбедноста во регионот“- стои во изјавата.
Изјавата од САД доаѓа во пресрет на закажаната средба на министрите за надворешни работи на двете земји, Никола Димитров и Никос Коѕијас, со посредникот на ОН Метју Нимиц, на 30 март во Виена. Средбата е уште еден обид за приближување на ставовите за изнаоѓање прифатливо решение за спорот со името.