Грција ги проширува границите на море, Турција ова го смета како „причина за војна“

Атина ги проширува границите на море, а Анкара е претпазлива. 

Грчките пратеници го ратификуваа проширувањето на територијалните води во Јонско Море. Тие усвоија закон со кој територијалните води во Јонското Море се прошируваат од шест на 12 наутички милји.  Со проширувањето се потенцира правото на Грција да ја спроведе Конвенцијата на Обединетите нации за права на морето, со која во 1982 година е дозволена ширина на територијалните води од 12 милји.

„За прв пат од Додеканезите (островите) во 1947 година, националната територија е зголемена за околу 10%, со процедури целосно засновани на правилата на меѓународното право“, рече премиерот Кирјакос Мицотакис, обраќајќи се пред парламентот.

Во брзиот одговор на одлуката на грчкиот парламент за проширувањето на територијалните води во Јонското Море, Турција ја предупреди дека проширувањето на водите во Егејското Море ќе го смета за „причина за војна“, бидејќи со тоа, поради густата распределеност на грчките острови, ќе ѝ се блокира пристапот до меѓународните води. Турција „има витални права и интереси во полузатвореното Егејско Море, во кое доминираат посебни географски услови“, изјави портпаролот на турското Министерство за надворешни работи Хами Аксој.

Лани односите меѓу двете земји беа затегнати, при што дел од медиумите објавија дека германската канцеларка Ангела Меркел во последен момент спречила војна меѓу Турција и Грција.