ГРАЃАНИТЕ ПОЧНАА ДА КУПУВААТ УКРАСИ И ЕЛКИ: Koлку пари одвојуваат за декорирањето на домот?

Добивај вести на Viber

Граѓаните купуваат елки и украси со цел да го разубават домот по повод претстојните празници, Нова година и Божиќ. Во салоните за подароци, има голем избор на украси и тоа по различни цени. Елки  има во различни големини, oд минијатурни до грандиозни, од класични до модерни, буквално за сечиј џеб. Од салоните за подароци, велат дека граѓаните за да го декорираат домот, најскромно би потрошиле 50 евра, но има и луѓе кои трошат многу повеќе.

„Елките чинат од 1.100 до 18.000 денари. Има и луѓе што бираат поскапи елки. Купувањето на елките почнува сега и пикот е до 19 декември“, велат од салон за подароци во Скопје.

Се продаваат и шапки, дедомразовци, венчиња, новогодишни свеќи, чинии, чаши и друго.

„Кај нас елките чинат од 2.200 до 7.400 денари. Луѓето најмногу ги купуваат оние елки од 1.5 или 1.8 метри. Овој период обично граѓаните почнуваат да набавуваат елки“, додаваат од продавница за подароци во Пробиштип.

Природните елки се продаваат по цена од 1.400 до 4.000 денари. Луѓето ги купуваат, ги користат за декорирање на домот и потоа ги садат во дворот.

„Веќе 4 години ја користам истата елка, а кога  купувам украси, трошам до 2.000 денари“, објаснува Виолета Јовановиќ, граѓанка.

Друга жена вели дека приоритет дава на квалитетот при купување.

„Јас си имам елка, но лампиони купувам секоја година. Кога ја купував елката, бирав да е поквалитетна и да трае. Вчера ја накитивме и децата се навистина среќни. Лампиони и украси докупувам секоја година“, додава Наташа Денковска, граѓанка.

Но, има и луѓе кои украси нарачуваат од странство.

„Секоја втора година купувам нова елка. Дали ќе биде голема или мала, зависи од желбата на децата. Купуваме и лампиони, и сијалички. Не сум пресметувала колку трошам за украси, а го купувам она што ќе ми се допадне. Си нарачувам од странство. Украсувањето носи еуфорија и пријатни чувства“, вели штипјанка.

Елките ги красат домовите и во текот на јануари, месец полн со празници. Некои општини доделуваат и награди за најубаво украсените дворови пред Нова година. Секоја година, најмалку 50 милиони новогодишни елки се испорачуваат на клиентите во Европа. Полска е еден од најголемите производители на новогодишни елки во Европа, а големо производство има и во Австрија и во скандинавските земји.

foto freepik.com