Градоначалникот Митко Јанчев остро против винаријата „Мовино“: Недолични цени за откуп!

Добивај вести на Viber

Градоначалникот на Кавадарци, Митко Јанчев, на својот официјален профил на Фејсбук изрази разочарување од винаријата „Мовино“ по објавувањето на овогодинешните цени за откуп на грозјето.

„Сакам да изразам огромно разочарување а воедно и револт по денешното објавување на една од винариите за овогодинешните откупни цени на грозјето.
Винаријата Мовино излезе со неприфатливи и недолични цени за откуп. Со овие цени се потценува целиот труд на лозаропроизводителите, нивното макотрпно работење и нивниот производ“, напиша Јанчев на својот профил.

Тој ги повика и останатите винарии во тиквешкиот регион да не ги следат овие цени по кои ќе откупува „Мовино“.

„Апелирам до сите останати винарии овие цени во никој случај да не им бидат пример за нивните ценовници. За мене како градоначалник а воедно и како лозаропроизводител цени пониски од минатогодишните не се прифатливи.
Ќе побарам и итен состанок со Министерството за земјоделство и претставници на лозаропроизводителите за заеднички да најдеме решение за оваа ситуација.
Економската ситуација е лоша во целиот свет не само кај нас , но тоа во никој случај не треба да се одрази на лозарите“, додава тој.

Јанчев вели дека во меѓувреме контактирал со винаријата за да ги убеди да ги зголемат откупните цени.

„Во меѓувреме исконтактирав и со винаријата Мовино која исто така има став дека овие цени не се прифатливи , како што кажав овие цени се недолични и воопшто не треба ниту да се размислува за нив. Мојот став за кој ќе се борам до крај заедно со лозарите е дека треба под итно да се најде решение за нови откупни цени. По разговорот со винаријата , бев категоричен дека цените мора да се променат и дека мораме што поскоро да организираме состанок со Министерството за земјоделство и лозарите за да се дефинираат нови цени кои ќе бидат прифатливи“, смета градоначалникот.