ГОЛЕМ ПОЖАР: Веќе четири дена гори во Мариово

Добивај вести на Viber

Четврти ден гори во Мариово.  Горат нискостеблести растенија, но има зафатено и борови.

Повеќе од 200 професионалци, припадници на Армијата, на специјалната полиција, од ЈП „Национални шуми“, пожарникари од повеќе градови, цел ден се на терен во Мариово да го стават под контрола и да го изгаснат големиот пожар кој е активен четврти ден.  Од изутрината околу селото се распоредени пожарникари од Охрид.

Прилепскиот општински Кризен штаб ги координира акциите. Жителите на мариовското село Бонче поминаа неизвесна ноќ. Во опасност им беа имотите, ама пожарникарите помогнаа и не дозволија да има штети.

„Во селото сме 30-тина жители. Има и деца. Јас бев на првата линија во опасност, зашто мојата куќа е во почетокот на селото. Благодарен сум им на прилепските пожарникари и на пожарникарите од Битола кои не дозволија да ми изгори имотот, а имам и 30 грла добиток. Многу беше тешко. Пожарникарите постојано се на терен“, рече Жарко Маркоски, жител на селото Бонче.

Според директорот на Центарот за управување со кризи(ЦУК), Стојанче Ангелов кој беше на теренот во Мариово, делови од пожарот се изгаснати, но со топлото време се разгорува онаму каде преку ноќта огнот се стишил. Летово во земјава имаше стотици пожари. Најкритично беше во источниот дел на државата, во Пехчево. (МИА)