ГО СМЕНИВМЕ И ИМЕТО, вели претседателот Пендаровски - очекувам одлука

Добивај вести на Viber

Земјава го смени името за добивање датум, а тоа не го направи ниту една друга држава, вели, меѓу другото, претседателот на државава Стево Пендаровски во интервју за австрискиот весник „Пресе“. 

Тој за весникот изјавил дека земјава не се надева на сигнал, туку очекува одлука за добивање на датум за почеток на пристапните преговори на Северна Македонија.

„Не се надеваме на сигнал, очекуваме одлука. Во текот на изминатата година и пол, испорачавме сè што треба. Ние дури и го сменивме името по историскиот договор со Грција. Ниту една друга земја-кандидат досега не го сторила тоа. Ако ЕУ рече дека процесот на приближување е заснован на перформанси, тогаш не очекуваме повеќе или помалку отколку да се мери со тоа што сме го постигнале. Мојата порака е: Дајте ни шанса и да покажеме дека сме подготвени“, вели шефот на државава, Пендаровски во интервјуто.

Вчера амбасадорите не го прифатија предлогот на финското претседателство кои беа на линија на земјава да и се даде датум за старт на преговори, а во меѓувреме да се промени методологијата што ја бара Париз. 

За сега е неизвесно што ќе одлучат министрите на ЕУ и дали одлуката ќе ја донесат денес или утре.

Од она што постои како информација, Париз се уште не кажува дали ќе ја промени својата тврда позиција во однос на давањето датум за старт на преговорите на земјава со Европската унија.