Генералниот штрајк на СОНК на 11 ноември нема да се одржи
Објавено во: Македонија 07 Ноември, 2019
Најавениот генерален штрајк на професорите и наставниците на 11 ноември нема да се одржи, соопшти Синдикатот за образование, наука и култура.
Од таму информираат дека истиот е ставен во мирување до конечната понуда од Министерството за образаование и наука, потврди претседателот на СОНК, Јаким Неделков.
Тој додаде дека ваквата одлука се должи на тоа што Министерството за образование и наука му се потребни уште неколку дена за да ја изврши анализата за тоа колку средства може да се одобрат.
– Се прават напори за обезбедување на потребните средства. Ова не се празни фрази, туку силна заложба да се најде заедничко прифатливо решение, нагласи министерот за образование и наука Арбер Адеми.
Утре е последната средба на Неделков и синдикатот со министерот за образование Арбер Адеми пред конечниот став, а денеска премиерот Зоран Заев со својата изјава алудираше на тоа дека ќе биде постигнат договор.
- Утре министерот Адеми ќе ја соопшти веста, не сакам тоа да го кажувам наместо него. Тој сепак макотрпно работеше на овој договор, рече денеска Заев.
Во моментов понудата на министерството е уште еднаш да се зголемат платите за дополнителни 10 отсто на оние 5 отсто кои веќе се во сила од септември, но од април следната година. Неделков денеска рече дека индициите се дека исплатата на поголемата плата може да започне од почетокот на следната година, односно да не се чека до април.