(ФОТО) Редица за субвенции за велосипед и електричен тротинет
Објавено во: Економија 01 Јуни, 2020
Поради големиот интерес и мерките на претпазливост денеска се чека и до стотина метри за да се влезе во фамозната барака 16 во Град Скопје и да се побара субвенција за купен велосипед или електричен тротинет според принципот „прв дојден, прв услужен“. Денеска е првиот ден со можност да се аплицира по објавениот јавен повик.
Интересот на граѓаните коишто набавиле велосипед или електричен тротинет е многу голем, а редот и физичкото растојание меѓу граѓаните го одржуваат редари. Граѓаните коишто чекаат ред ги почитуваат препорачаните мерки за лична заштита и носат маски.
Новитет оваа година е што граѓаните ќе можат да доставуваат фискални сметки за купен велосипед или електричен тротинет од 01.01.2020 година. Средствата што Градот Скопје ќе ги субвенционира се во износ од 50 отсто од вредноста на велосипедот, но не повеќе од 3.000 денари по лице, со вклучен персонален данок на доход, и 30 отсто од вредноста на електричниот тротинет, но не повеќе од 7.000,00 денари по лице, со вклучен персонален данок на доход.